卒之畀跳甲先生擺咗上檯，將我嘅食相分別放咗喺[url=http://ah_zalice.mysinablog.com/index.php?op=ViewArticle&articleId=570372]本地菜譜[/url]同埋本地菜園網誌喥。
冇法啦，而家要承認責任：我係本地菜會其中一個老闆，有一股股份。
做菜會老闆要具備兩個基本條件：
畀五萬蚊同埋起碼要有一個菜會嘅老闆肯推薦您入去做老闆，咁您就買到一股股份嘞。
您重要當您丟咗嗰五萬蚊落鹹水海，冇回頭至得。
重有，每位老闆一人一票。
即係話，就算您買咗十萬、廿萬又或者好多萬股份都好，賺到就照股數分錢，多股多得，但係投票時就有幾多股都係以人頭計，一人得一票，唔係有錢大哂。
做菜會老闆有乜好處？除咗可以優先自費買本地菜園嘅有機菜之外，重有一啲全世界嘅老闆都得唔到嘅福利：如果菜會叫您去幫忙嘅時候，您一心軟應承，如果係落田就要預埋畀蚊叮蟲咬日曬雨淋，去社區做推廣就要預埋拋頭露面擔擔抬抬；男女平等，同工無籌。
啲條件同福利係咪好有深度呢？您或者會諗：short 嘅先會落搭。
我諗我一定係有啲 short short 地。
本地菜會成立有段故：
2002年某天，有綠紀元生機店客人忽發奇想，同老闆施姐姐同埋玖哥講：既然你地都賣開優質有機雜貨賣咗咁多年咯，不如賣埋有機菜，咁我地咪可以有又冇農藥污染、又新鮮、又安全、又環保嘅有機蔬菜食囉。
時常自命與世無爭嘅玖哥其實一早就想做農夫，好謙恭噉話自己唔識種菜兼冇錢，佢啲客講到興起，都話最多佢地一人一份出錢，支持玖哥出力。
呢個想生機店賣埋有機菜嘅消息亦一傳十咁傳開去，好多生機店嘅客人知道之後都非常支持，叫玖哥唔駛擔心錢銀問題，速速去學種菜。
玖哥於是的起心肝跟個老農夫耕足一年田，與農作物一整經歷春夏秋冬四季嘅田間變化，明白盤中餐粒粒皆辛苦嘅道理，遵守跳甲先生建議嘅國際有機標準嘅要求，成為一個有機農夫。
2004年1月18日，本地菜會由好多個生機店客人集資，成功覓地開耕…
轉眼到今日2010年，菜園已經運作咗六個年頭，期間起起落落多不勝數，全靠一班有錢出錢、有力出力、有腦筍出腦筍嘅無私嘅老闆撐場，玖哥可以完完全全好自由噉去營運佢心目中嘅有機菜園，等多啲香港人食到即日收割、新鮮運到嘅本地菜園有機蔬菜，照顧到自己同家人嘅安好，支持到本地嘅有機行業，保護到本地嘅鄉郊環境，實現到一個有志成為有機農夫嘅人嘅夢想。